烏克蘭礦產協定的龐大利好訊號
0
0
0
0
上星期對股市最重要嘅新聞，就係烏克蘭與美國簽署一項重要的礦產資源協議。
美股外幣即時報價 多國新聞任睇
本來，美國總統特朗普多次批評烏克蘭總統澤連斯基，言論甚至親俄。最後，協定竟然相對溫和，條款包括建立一個由烏美雙方共同持有並管理的「重建投資基金」，以促進烏克蘭的長期和平與經濟安全。烏克蘭需提供其「政府擁有的自然資源資產」未來收益的50%，烏克蘭保留對其資源的完全所有權，並且該基金僅適用於新的投資項目。
協定釋放的重要訊息，就係上星期本欄所講嘅兩大要素：一、特朗普講嘢冇句真；二、開天殺價落地還錢。行動先係真，就係用冇句真而又乞人憎嘅嘅言論，製造緊張感，然後為簽單帶嚟壓力，最終簽訂嘅協議遠遠較口講嘅冇咁辣。
類似嘅協定，未來兩個月，即係90日關稅暫緩限期前，將會重複發生。4月29日，美國商務部長表示，與一個未具名國家嘅貿易協定已經完成，外界普遍猜測該國為印度。 雙方正就降低或取消關稅進行談判，目標係到2030年將雙邊貿易額提高到5,000億美元。另外，4月中美國副總統萬斯已表示，有「好大機會」與英國簽署貿易協定，雙方正就數位服務稅等問題進行討論。
以標普500指數計算，關稅令美股下跌超過15%，公佈對等關稅前為5670點，指數現時已經高過此水平，因為4月經濟數字陸續公佈，除咗較早前冇乜點變之外，截至2025年4月，美國勞動市場表現出乎意料地強勁，新增非農就業職位達177,000個，超出市場預期的138,000個，失業率維持在4.2%不變。反映主流傳媒所講嘅關稅跌跌跌冇發生，只係幻想，至少暫時未發生。
有烏克蘭協議做辦，未來嘅關稅協定一定係好消息多過壞消息，只要達成其中一樣：外國投資美國更多；或雙邊關稅下跌，美國嘅情況就比公佈對等關稅前更佳。當簽訂到十零廿個有如印度英國日本等主要國家，原先反應較大嘅加拿大、歐盟等，都會被逼埋枱傾。再進一步如果美國計得掂條數，原先嘅免入息稅大餅畫得成，美國人嘅消費力再上一層樓，股市嘅反應肯定更大。
正如上星期本欄所言，有關對等關稅至衰退嘅分析邏輯唔通，一方面覺得特朗普唔可信，另一方面又逐字逐句當金句咁分析對經濟影響，立論起點究竟係冇句真定句句真，專家永遠唔會講清。好驚好驚維持一個月，已回到對等關稅前水平，正如特朗普所講，呢個係拜登股市（Biden’s Stock Market），呢句本欄認為係心底話，因為拜登都畀咗：一、2022年大跌上車；二、2023至2024年連升兩年。如果係拜登股市又冇乜壞吖。
