吳泳偷食已婚健身教練後向大婆道歉 保證唔再見面 受害人妻神回覆︰下次快啲着衫走
0
0
0
0
網路創作團隊小薯茄成員吳冰嘅妹妹吳泳，被爆同已婚健身教練William喺健身室鬼混，捉姦在床嘅大婆Fafa更加連發多個story直接開名指控吳泳。捲入事件嘅小薯茄喺fb發聲明，表示「本公司與旗下所有成員同樣透過報導才得悉事情，亦立即與該健身教練終止個別成員的贊助合作，就事件為公眾帶來困擾和影響，我們感到抱歉和遺憾。」，又強調事件不牽涉公司成員。
目睹老公偷食嘅Fafa一度瘋狂出post大控訴，更公開佢同William對質嘅錄音內容，當中包括William提及同吳泳第一次親密接觸嘅過程，又直指老公係「健身界之恥」。Fafa仲燒埋小三吳泳嘅家姐阿冰嗰疊，指責阿冰令William同吳泳認識，「你帶過嚟，但又唔理佢三觀不正嘅事實。」
到尋日傍晚Fafa再發文，但對吳冰以至小薯茄嘅態度有所軟化，對於小薯茄嘅聲明表示支持，又指「本身係觀眾到認識你地 係一種緣份亦係幸運 因為你地真係人好好 無架子 好貼地 而且係你地身上好多觀眾都快樂。呢件事完全唔關其他人事 只有健身偷食二人組-應該要道歉」。
到較後時間，Fafa再發story貼出相信係吳泳向佢發出嘅道歉訊息，疑似吳泳寫道「對不起，這件事我真的做錯了。我非常後悔，對你所造成的傷害，我做甚麼也無法彌補。但是我很想誠懇地向你道歉，真的很對不起。我保證以後不會再跟他有任何接觸或聯絡，對不起，Wing」。而FaFa就回應「不要再搞老公 人地男人 其實真係唔好 你愛惜自己吧」。吳泳再次道歉，Fafa續道「我哋已經被你哋破壞咗。一個家 就係咁散。你下次俾人捉到姦 快啲着衫走 唔好再瞓喺人哋度」、「你家姐都好慘，你累埋佢」。
其後FaFa亦貼上老公William嘅留言，表示「Sorry老婆 我唔知道有冇機會可以珍惜你 但我真係好愛你 我依家會做嘅係保護番你 唔想你再受委屈」。FaFa喺貼上吳泳及William留言嘅story上寫上End，並表示「40小時後 事情完 我接受你哋道歉 但已經無需要有結果 我已經冇咗靈魂 搵唔到我個心，周地都係。」。現時Fafa已經將個人IG轉為私人帳戶。
