佘詩曼聞王大陸被捕O咀驚訝表情被瘋傳網民︰鼻孔都大了

一个编辑 2025年 2月 21日

1 min read

Read Time:20 Second

主要負責TVB合拍劇製作嘅77工作室前晚（星期三）舉行春茗，曾經為77工作室拍《新聞女王》嘅佘詩曼都有出席。阿佘當晚本來配合主人家，透露咗為77拍嘅新劇《正義女神》花絮，並提到《新聞女王2》就快開工，佢已經睇定劇本做緊功課。

《新聞女王》嘅Man姐處變不驚，但係佘詩曼前晚接受記者圍訪時，竟然俾一條問題嚇到O咀！曾經同阿佘合作演出內地綜藝節目嘅王大陸，日前因為涉嫌逃兵役被台灣當局拘捕，去到圍訪尾聲有記者問阿佘有冇留意王大陸嘅新聞，阿佘本來好奇問「咩新聞呀」，記者就話王大陸逃兵役被捕。佘詩曼聽罷立即擘大口得個窿，顯得相當驚訝，成個人自動靜音3秒。定過神之後阿佘回復微笑話「我諗誤會嚟嘅」，但記者們紛紛話「真架」，阿佘好似受到衝擊咁擘大對眼，然後都係答「我諗誤會嚟嘅」。大家都等佘詩曼再發言，阿佘唯有笑一笑話「我唔知呀，唔……我諗佢會處理架啦」，又叫王大陸「要乖仔啦」。

片段好快就被內地網民瘋傳，大家都爭相狂loop佘詩曼嘅驚訝樣，直呼「好可愛」、「鼻孔都大了」，甚至稱呢個片段係「二月份最好笑娛樂採訪」。

佘詩曼2020年時參加內地真人騷《看我的生活》，同台灣男星王大陸去約會，節目中口沒遮攔嘅王大陸，同阿佘講起玩刺激機動遊戲時，就回答話年紀越大嘅時候就會開始怕死。阿佘聽到即刻瞪大隻眼睥實王大陸問係唔係暗示緊佢年紀大，仲話自己唔鍾意人講年紀嘅問題，嚇到王大陸要即刻安撫阿佘。成個節目中佘詩曼同王大陸有唔少互動，難怪聽到對方有事，阿佘即刻O晒咀。